មន្ត្រីសង្គមស៊ីវិលជំរុញអាជ្ញាធរដាក់ទោសធ្ងន់ធ្ងរដល់ជនល្មើស ក្រោយពេលរឹបអូសសារធាតុមេតាណុលក្លែងបន្លំ
មន្ត្រីសង្គមស៊ីវិលជំរុញអាជ្ញាធរឱ្យដាក់ទោសធ្ងន់ធ្ងរដល់ជនល្មើស ក្រោយពីបានរឹបអូសសារធាតុមេតាណុលក្លែងបន្លំជាអេតាណុល ឬអាកុលក្លែងក្លាយ ៩.៦៩២លីត្រ សម្រាប់ប្រើប្រាស់សម្លាប់មេរោគកូវីដ១៩។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍ និងសន្តិភាព លោក យង់ គឹមអេង មានប្រសាសន៍ថា លោកសាទរចំពោះវិធានការបង្ក្រាប និងរឹបអូសការក្លែងបន្លំសារធាតុផ្សំមេតាណុលនេះ ប៉ុន្តែលោកជំរុញសមត្ថកិច្ច ឱ្យពង្រឹងវិធានការម៉ឺងម៉ាត់បន្ថែមទៀត និងដាក់ទោសជនល្មើសឲ្យបានធ្ងន់ធ្ងរ ស្របពេលដែលពលរដ្ឋកំពុងប្រឈមគ្រោះថ្នាក់ដល់សុខភាព ដោយសារការឆ្លងរាលដាលជំងឺកូវីដ១៩៖ «ផលិតផលក្លែងក្លាយនេះ ជាគ្រោះថ្នាក់មួយធំ ហើយអាជ្ញាធរបានទប់ស្កាត់កន្លងមក។ ក្នុងកាលៈទេសៈនេះ ដែលកម្ពុជាកំពុងប្រឈមនឹងជំងឺកូវីដ១៩ យ៉ាងគ្រោះថ្នាក់ អ៊ីចឹងផលិតផលបង្កគ្រោះថ្នាក់នេះ គួរតែចាត់វិធានការឲ្យបានតឹងរ៉ឹង ហើយអាជ្ញាធរត្រូវដាក់ទោសធ្ងន់ធ្ងរ កុំឲ្យគាត់យកឱកាសនេះបន្តធ្វើបាបគេបន្តទៀត»។
សំណូមពររបស់មន្ត្រីសង្គមស៊ីវិលនេះ ក្រោយពេលដែលមន្ត្រីជំនាញរកឃើញការលក់អាល់កុល (Alcohol) ក្លែងក្លាយ ចំនួន ៣ ករណី រួមមាន នៅខេត្តរតនគីរី ខេត្តបាត់ដំបង និងនៅរាជធានីភ្នំពេញ។
អង្គការសុខភាពពិភពលោកឲ្យដឹងថា សារធាតុមេតាណុល (Methanol) មិនត្រូវបានអនុញ្ញាតឱ្យប្រើប្រាស់ជាសារធាតុផ្សំសកម្ម នៅក្នុងការផលិតសារធាតុលាងសម្អាតដៃឡើយ ដោយសារធាតុនេះ គឺជាសារធាតុពុល គ្មានប្រសិទ្ធភាពសម្លាប់មេរោគកូវីដ១៩ នោះទេ តែនឹងធ្វើឱ្យរលាកស្បែក ស្រវាំងភ្នែក ឈឺក្បាល និងវិលមុខ ក្អួតចង្អោរជាដើម។ សារធាតុមេតាណុល គឺជាអាល់កុលពុល គ្មានពណ៌ ដែលមានលក្ខណៈស្រដៀងគ្នាខ្លាំងទៅនឹងអាល់កុលធម្មតា ហើយភាគច្រើនគេប្រើសម្រាប់ធ្វើជាសារធាតុរំលាយ៕
0 Comments